ସାନଛତା ମଠ ସଂଲଗ୍ନ ଦୋକାନ ଘର ଭଙ୍ଗାଗଲା
ପୁରୀ, ୧୧ ଡ଼ିସେମ୍ବର – ଶ୍ରୀମନ୍ଦିର ସୁରକ୍ଷା ଜୋନରେ ଉଚ୍ଛେଦ କାର୍ଯ୍ୟ ଜୋରଦାର ଧରିଛି । ବୁଧବାର ଦିନ ସାନଛତା ମଠରେ ଚାଲୁଥିବା ଲଜିଂ ଘରକୁ ଭଙ୍ଗାଯାଇଛି । ବଡଆଖଡା ମଠପଟୁ ଏହି ଭଙ୍ଗାକାର୍ଯ୍ୟ ଆରମ୍ଭ ହୋଇଛି ।
ବ୍ୟାପକ ପୁଲିସ ମୁତୟନ ସହ ଦୁଇଟି ବୁଲଡୋଜର ଏହି କାର୍ଯ୍ୟରେ ନିୟୋଜିତ ହୋଇଚି । ଉପଜିଲ୍ଲାପାଳ ଭବତାରଣ ସାହୁ ସାନଛତା ମଠ, ମଙ୍ଗୁମଠ ଓ ମଣିକର୍ଣ୍ଣିକା ସାହି ଉଚ୍ଛେଦ କାର୍ଯ୍ୟ ଘନ ଘନ ତଦାରଖ କରୁଛନ୍ତି । ସାନଛତା ମଠ ଭିତରେ ଥିବା ମନ୍ଦିରଟି ସଂପୂର୍ଣ୍ଣ ଲୁକ୍କାୟିତ ଅବସ୍ଥାରେ ରହିଥିଲା । ଏବେ ବଡ ଆଖେଡା ମଠ ଠାରୁ ସାନଛତା ମଠର ମନ୍ଦିର ଦୃଶ୍ୟମାନ ହୋଇଛି ।
ଦୋଳବେଦୀ କୋଣରେ ଥିବା ରଞ୍ଜନ ଲୁହା ଦୋକାନ ମଧ୍ୟ ଭଙ୍ଗାଯିବ । ସେହିପରି ମଙ୍ଗୁମଠ ଚାରିପଟେ ଥିବା ୨୨ଟି ବ୍ୟବସାୟିକ ଅନୁଷ୍ଠାନ ଭଙ୍ଗାକାର୍ଯ୍ୟ ଶେଷ ପର୍ଯ୍ୟାୟରେ ପହଂଚିଛି । କେବଳ ଭଙ୍ଗା ଇଟାପଥର ବୁହାଯିବ । ମଙ୍ଗୁମଠର କୋଠାଗୁଡିକ ଭଙ୍ଗାଯିବା ପରେ ମନ୍ଦିର ଦୃଶ୍ୟମାନ ହେବା ସହ ସିଂହଦ୍ୱାର ସମ୍ମୁଖ ରାସ୍ତା ସଂପୂର୍ଣ୍ଣ ଖୋଲା ହୋଇଯାଇଛି । ଏହାସହ ଦୋଳମଣ୍ଡପ ସାହି ପ୍ରବେଶ ପଥ ଓଷାରିଆ ହୋଇଯାଇଛି ।
୪ ପ୍ଲାଟୁନ୍ ପୁଲିସ ଫୋର୍ସ ସହ ଟ୍ରାଫିକ୍ ନିୟନ୍ତ୍ରଣ ପାଇଁ ୧ ପ୍ଲାଟୁନ୍ ଟ୍ରାଫିକ ପୁଲସ ନିୟୋଜିତ ହୋଇଛନ୍ତି ।
