ଓଡ଼ିଶାର ଶିଳ୍ପ ବାତାବରଣ ନିବେଶ ଅନୁକୂଳ
୧୪,୪୦୦ କୋଟି ଟଙ୍କା ନିବେଶ କରିବ ବିର୍ଲା ଗ୍ରୁପ୍
୧ଲକ୍ଷ କୋଟି ନିବେଶ କରିବ ଜିନ୍ଦଲ
ଡିଜିଟାଲ କ୍ଷେତ୍ରରେ ୩ ହଜାର କୋଟି ଟଙ୍କା ନିବେଶ କରିବ ରିଲାଏନ୍ସ
୨୩,୫୦୦ କୋଟି ଟଙ୍କା ବିନିଯୋଗରେ ସମ୍ପ୍ରସାରିତ ହେବ କଳିଙ୍ଗ ଷ୍ଟିଲ ପ୍ଲାଣ୍ଟ
ଶିଳ୍ପାୟନରେ ଭାଗୀଦାର ହୋଇଛି ଫିକି
ଭୁବନେଶ୍ୱର,୧୨ା୧୧ : ଓଡ଼ିଶା ଗତ ଦୁଇ ଦଶନ୍ଧି ମାଧ୍ୟମରେ ଶିଳ୍ପାୟନ କ୍ଷେତ୍ରରେ ଦ୍ରୁତ ଅଭିବୃଦ୍ଧି ହାସଲ କରିଛି । ଆଗାମୀ ଦିନରେ ଶିଳ୍ପାୟନର ନୂଆ ସୁଯୋଗ ଓ ସମ୍ଭାବନା ପାଇଁ ବ୍ୟାପକ ଯୋଜନା ପ୍ରସ୍ତୁତ ହୋଇଛି । ପର୍ଯ୍ୟାୟ ଖଣିଜ ଓ ବନ୍ଦର ଭିତ୍ତିଭୂମି ସହିତ ନିବେଶ ଅନୁକୂଳ ପରିବେଶ ଯୋଗୁଁ ଓଡ଼ିଶାର ଶିଳ୍ପାୟନରେ ଏହି ପ୍ରଗତି ସମ୍ଭବ ହୋଇପାରିଛି । ଏକ ସ୍ଥିର ସରକାର, ଦୃଢ଼ ନେତୃତ୍ୱ ଓ ସୁଦୂର ପ୍ରସାରୀ ଦୃଷ୍ଟିଭଙ୍ଗୀ ରାଜ୍ୟରେ ନିବେଶ ଅନୁକୂଳ ବାତାବରଣ ସୃଷ୍ଟି କରିବା ସହିତ ଏକ ଶିଳ୍ପ ସମୃଦ୍ଧ ଓଡ଼ିଶା ପାଇଁ ବିପୁଳ ସମ୍ଭାବନା କରିଛି । ‘ମେକ୍ ଇନ୍ ଓଡ଼ିଶା କନକ୍ଳେଭ ୨୦୧୮’ରେ ଦେଶର ବିଶିଷ୍ଟ ଶିଳ୍ପପତିମାନେ ଏହି ମତ ଦେଇଛନ୍ତି ।
‘ମେକ୍ ଇନ୍ ଓଡ଼ିଶା କନକ୍ଳେଭ ୨୦୧୮’ର ଆଜି ଦିବସର ସ୍ୱତନ୍ତ୍ର ଅଧିବେଶନରେ ଦେଶର ପ୍ରମୁଖ ଶିଳ୍ପପତି ଯୋଗ ଦେଇ ଓଡ଼ିଶା ଶିଳ୍ପାୟନର ଅଭିବୃଦ୍ଧି ଓ ଭବିଷ୍ୟତ ସମ୍ପର୍କରେ ମତ ରଖିଥିଲେ । ଅଧିବେଶନର ପ୍ରାରମ୍ଭରେ ଆଦିତ୍ୟ ବିର୍ଲା ଗ୍ରୁପ୍ର ଅଧ୍ୟକ୍ଷ କୁମାର ମଙ୍ଗଳମ ବିର୍ଲା କହିଲେ ଯେ, ଓଡ଼ିଶାର ଶିଳ୍ପ ଓ ବ୍ୟବସାୟିକ ଅନୁକୂଳ ବାତାବରଣ ଯୋଗୁଁ ବିର୍ଲା ଗ୍ରୁପ୍ ରାଜ୍ୟର ଅର୍ଥନୈତିକ ଓ ସାମାଜିକ ବିକାଶରେ ନିଜକୁ ସାମିଲ କରିପାରିଛି । ଏହି କାର୍ଯ୍ୟଧାରା ବଜାୟ ରଖିବା ପାଇଁ ବିର୍ଲା ଗ୍ରୁପ୍ ଆଗାମୀ ଦିନରେ ୧୪,୪୦୦୦ କୋଟି ଟଙ୍କା ନିବେଶ କରିବାର ଯୋଜନା ରଖିଛି ।
ଅଧିବେଶନରେ ମତ ରଖି ଜିନ୍ଦଲ ଗ୍ରୁପ୍ର ଅଧ୍ୟକ୍ଷ ନବୀନ ଜିନ୍ଦଲ କହିଲେ ଯେ, ସୁପ୍ରିମକୋର୍ଟଙ୍କ ରାୟ ପରେ ଦେଶର ଅନେକ କୋଇଲା ଖଣି ବନ୍ଦ ହୋଇଯାଇଥିଲା । ଏଥିଯୋଗୁଁ ଜିନ୍ଦଲ ଗ୍ରୁପ୍ର ଓଡ଼ିଶାରେ ପ୍ରତିଷ୍ଠିତ କୋଇଲା-ବାଷ୍ପୀକରଣ ପ୍ରକଳ୍ପ ଗୁରୁତର ପ୍ରଭାବିତ ହୋଇଥିଲା । ସଂସ୍ଥା ପ୍ରଭୂତ କ୍ଷତି ସହିଥିଲା । କିନ୍ତୁ ରାଜ୍ୟର ନିବେଶ ଓ ଶିଳ୍ପ ଅନୁକୂଳ ବାତାବରଣ ପାଇଁ ଜିନ୍ଦଲ ଗ୍ରୁପ୍ ପୁଣିଥରେ ବ୍ୟବସାୟ ଓ ଶିଳ୍ପାୟନ ଅଭିବୃଦ୍ଧି ହାସଲ କରିପାରିଲା । ଏହାଭିତରେ ଆମେ ଅନେକ ଆହ୍ୱାନର ସମ୍ମୁଖୀନ ହୋଇଛୁ । ରାଜ୍ୟ ସରକାରଙ୍କ ସହଯୋଗ ଓ ଶ୍ରୀଜଗନ୍ନାଥଙ୍କ ଆଶୀର୍ବାଦ ଯୋଗୁଁ ଆମେ ସବୁ ଆହ୍ୱାନକୁ ମୁକାବିଲା କରିବାରେ ସଫଳ ହୋଇଛୁ । ଆଗାମୀ ଦିନରେ ଜିନ୍ଦଲ ଓଡ଼ିଶାରେ ୧ଲକ୍ଷ କୋଟି ଟଙ୍କା ନିବେଶ କରିବ ବୋଲି ଏହି ଅବସରରେ ଶ୍ରୀ ଜିନ୍ଦଲ ସୂଚନା ଦେଇଥିଲେ । ଏଥିସହିତ ଓଡ଼ିଶା ଅର୍ଥନୈତିକ-ସାମାଜିକ ପ୍ରଗତିରେ ଜିନ୍ଦଲ ନିଜକୁ ସାମିଲ କରିପାରିଛି ବୋଲି କହିଥିଲେ ।
ନବୀନଙ୍କ ବଡ ସଜ୍ଜନ ଜିନ୍ଦଲ, ସେଲର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅନୀଲ କୁମାର ଚୌଧୁରୀ, ଆଇଟିସିର ମୁଖ୍ୟ ପରିଚାଳନା ଅଧିକାରୀ ସଞ୍ଜିବ ପୁରୀ, ବେଦାନ୍ତ ଗ୍ରୁପ୍ର ଅଧ୍ୟକ୍ଷ ଅନୀଲ ଅଗ୍ରୱାଲ ପ୍ରମୁଖ ରାଜ୍ୟର ଅନୁକୂଳ ନିବେଶ ବାତାବରଣ ଓ ରାଜ୍ୟ ସରକାରଙ୍କ ସହଯୋଗର ଉଚ୍ଚ ପ୍ରଶଂସା କରିଥିଲେ । ‘ମେକ୍ ଇନ୍ ଓଡ଼ିଶା କନକ୍ଲେଭ ୨୦୧୮’ର ଅନ୍ୟତମ ଆୟୋଜକ ‘ଫିକି’ର ସଭାପତି ସନ୍ଦୀପ ସୋମାନି କହିଲେ ଯେ, ଆରମ୍ଭରୁ ‘ମେକ୍ ଇନ୍ ଓଡ଼ିଶା କନକ୍ଳେଭ’ରେ ଫିକି ନିଜକୁ ସାମିଲ କରିଛି । ରୋଡ୍ ଶୋ’ ଆୟୋଜନଠାରୁ ଆରମ୍ଭ କରି ଶିଳ୍ପାୟନରେ ଯୋଗଦାନ ଦେଇଛି ।
ଅଧିବେଶନରେ ଟାଟା ସନର କାର୍ଯ୍ୟନିର୍ବାହୀ ଅଧ୍ୟକ୍ଷ ଏନ୍ ଚନ୍ଦ୍ରଶେଖରନ୍ ଯୋଗଦେଇ ଟାଟା ଷ୍ଟିଲର ବିଭିନ୍ନ ପ୍ରକଳ୍ପର ଅଗ୍ରଗତି ସମ୍ପର୍କରେ ସୂଚନା ଦେଇଥିଲେ । କଳିଙ୍ଗନଗର ଷ୍ଟିଲ୍ ପ୍ଲାଣ୍ଟର ସମ୍ପ୍ରସାରଣ ସମ୍ପର୍କରେ ସୂଚନା ଦେବା ସହିତ ଗୋପାଳପୁର ଷ୍ଟିଲ୍ ପ୍ଲାଣ୍ଟ ଖୁବଶୀଘ୍ର କାର୍ଯ୍ୟକ୍ଷମ ହେବ ବୋଲି କହିଥିଲେ । ପ୍ରାୟ ୨୩,୫୦୦ କୋଟି ଟଙ୍କା ବ୍ୟୟରେ କଳିଙ୍ଗନଗର ଷ୍ଟିଲ ପ୍ଲାଣ୍ଟ ବର୍ତ୍ତମାନର ୩ ନିୟୁତ ଟନ୍ରୁ ୮ ନିୟୁତ ଟନକୁ ବୃଦ୍ଧି ପାଇବ ବୋଲି ଶ୍ରୀ ଚନ୍ଦ୍ରଶେଖରନ୍ କହିଥିଲେ ।
