ଜୁଲାଇ ୨୦ ରେ ପାଟକୁରା ବିଧାନ ସଭା ଆସନ ପାଇଁ ନିର୍ବାଚନ
କେନ୍ଦ୍ରାପଡ଼ା, ୦୪ ଜୁଲାଇ – ଆସନ୍ତା ୨୦ ତାରିଖ ଦିନ ପାଟକୁରା ବିଧାନ ସଭା ଆସନ ପାଇଁ ନିର୍ବାଚନ ଅନୁଷ୍ଠିତ ହେବ ବୋଲି ଆଜି କେନ୍ଦ୍ରାପଡା ଜିଲ୍ଲାପାଳ ସମର୍ଥ ବର୍ମା ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ଏହି ନିର୍ବାଚନରେ ୨ଲକ୍ଷ ୪୪ ହଜାର ୭୪୭ ଜଣ ଭୋଟର ୩୦୯ ଟି ଭୋଟ୍ କେନ୍ଦ୍ରରେ ସେମାନଙ୍କର ମତ ସାବ୍ୟସ୍ତ କରିବେ । ସେମାନଙ୍କ ମଧ୍ୟରୁ ୧ ଲକ୍ଷ ୨୭ ହଜାର ୪୩୧ ଜଣ ପୁରୁଷ ଭୋଟର ଥିବା ବେଳେ ୧ ଲକ୍ଷ ୧୭ ହଜାର ୩୦୬ ଜଣ ମହିଳା ଭୋଟର ଅଟନ୍ତି ।
ସୁଚନା ଯୋଗ୍ୟ ଯେ ,ଗତ ସାଧାରଣ ନିର୍ବାଚନ ସମୟରେ ପାଟକୁରା ବିଧାନ ସଭା ଆସନ ପାଇଁ ପ୍ରତିଦ୍ୱନ୍ଦିତା କରୁଥିବା ପ୍ରାର୍ଥୀଙ୍କ ମଧ୍ୟରୁ ବିଜୁ ଜନତା ଦଳର ବିଧାୟକ ପ୍ରାର୍ଥୀ ବେଦ ପ୍ରକାଶ ଅଗୱାଲାଙ୍କ ଦେହାନ୍ତ ହୋଇ ଥିଲା । ଫଳରେ ଏହି ଆସନ ପାଇଁ ନିର୍ବାଚନ ବନ୍ଦ ରହିଥିଲା । ଏହି ନିର୍ବାଚନ ଆସନ୍ତା ୨୦ ତାରିଖ ରେ ହେବା ସହ ୨୪ ତାରିଖରେ ଭୋଟ ଗଣତି ହେବ ବୋଲି ପାଇଁ ନିର୍ବାଚନ କମିଶନ୍ଙ୍କ ପକ୍ଷରୁ ଘୋଷଣା କରାଯାଇଛି । ଏହି ନିର୍ବାଚନ ତାରିଖ ଘୋଷଣା ହେବା ପରେ ପାଟକୁରା ରାଜନୀତି ସରଗରମ ହୋଇ ପଡିଛି । ବହୁ ଚର୍ଚ୍ଚାରେ ଥିବା ବିଜେପିର ବିଧାୟକ ପ୍ରାର୍ଥୀ ବିଜୟ ମହାପାତ୍ର ଶ୍ରୀ ଗୁଣ୍ଡିଚାରେ କେନ୍ଦ୍ରାପଡାର ଆରାଧ୍ୟ ପ୍ରଭୁ ଶ୍ରୀ ବଳଦେବଜୀଉଙ୍କୁ ରଥରେ ଦର୍ଶନ କରି ଯାଇଛନ୍ତି । ସେହି ପରି ସ୍ୱର୍ଗତ ବେଦ ପ୍ରକାଶ ଅଗୱାଲାଙ୍କ ପତ୍ନୀ ବିଜୁ ଜନତା ଦଳର ବିଧାୟକ ପ୍ରାର୍ଥୀ ସାବିତ୍ରୀ ଅଗୱାଲା ଓ କଂଗ୍ରେସ ଦଳର ପ୍ରାର୍ଥୀ ଜୟନ୍ତ ମହାନ୍ତି ମଧ୍ୟ ନିର୍ବାଚନ ମଣ୍ଡଳୀ ରଥ ଯାତ୍ରାରେ ପହଂଚି ଶ୍ରୀ ଜୀଉମାନଙ୍କ ଆର୍ଶୀବାଦ ଭିକ୍ଷା କରିଛନ୍ତି ।
