ପୁଣି ଚାଷ ଜମିରେ ବାରାହା ଉପଦ୍ରବ
ନୂଆପଡା, ନୂଆପଡା ଜିଲ୍ଲା ଖଡିଆଳର ବିଭିନ୍ନ ଗ୍ରାମରେ ଗତ କିଛି ଦିନ ଧରି ବାରାହା ଉପଦ୍ରବ ଯୋଗୁଁ ଚାଷିଙ୍କ ଧାନ ଫସଲ ନଷ୍ଟ ହେଉଥିବା ନେଇ ଅଭିଯୋଗ ହୋଇଛି । ଆଜି ବ୍ଲକର ଡୁମେରବାହାଲ ଗ୍ରାମର ଚାଷି କେତନ ସିଂ ବାରିକଙ୍କ ଚାଷ ଜମିରେ ବାରାହା ପଲ ଆସି ଧାନ ଚାଷକୁ ନଷ୍ଟ କରିଥିବା ଅଭିଯୋଗ କରିଛନ୍ତି । ଏନେଇ ଶ୍ରୀ ବାରିକ ଖଡିଆଳ ବନାଂଚଳ ଅଧିକାରୀଙ୍କୁ ଅଭିଯୋଗ କରି କ୍ଷତିପୂରଣ ପ୍ରଦାନ କରିବାକୁ ଦାବୀ କରିଛନ୍ତି ।
ସୂଚନା ଥାଉକି ଚଳିତ ବର୍ଷକୁ ମିଶାଇ ନୂଆପଡା ଜିଲ୍ଲା ସହ ଖଡିଆଳ ଅଂଚଳରେ ୪ ବର୍ଷ ଧରି ଲଗାତାର ମରୁୁଡି ପରିସ୍ଥିତି ସୃଷ୍ଟି ହୋଇଥିବା ବେଳେ ଚାଷିଙ୍କ ମଧ୍ୟରେ ହତାଶାଭାବ ଦେଖାଦେଇଛି । ହେଲେ କିଛି ଚାଷି ସ୍ଥାନୀୟ ତିଖାଲି ଡ୍ୟାମରୁ ଜଳସେଚନ ଥିବା ଜମି ମାନଙ୍କରେ ଚାଷ କରୁଥିବା ବେଳେ ବାରାହା ପଳ ଦାଉ ସାଧୁଥିବାରୁ ଚାଷି ମହଲରେ ଭାଲେଣି ଦେଖାଦେଇଛି । ଉଚ୍ଚ କତୃପକ୍ଷ ତୁରନ୍ତ ଦୃଷ୍ଟି ଦେଇ ଏକ ତଦନ୍ତ କରି କ୍ଷତିଗ୍ରସ୍ତ ଚାଷିଙ୍କୁ ଉପଯୁକ୍ତ କ୍ଷତିପୂରଣ ପ୍ରଦାନ କରିବାର ବ୍ୟବସ୍ଥା କରିବାକୁ ସାଧାରଣରେ ଦାବୀ ହେଉଛି ।
