ରେଳ ଧାରଣାରେ ଫାଟ : ଦୁର୍ଘଟଣାରୁ ଅଳ୍ପକେ ବର୍ତିଲା ହୀରାଖଣ୍ଡ ଏକ୍ସପ୍ରେସ୍
ରାୟଗଡ଼ା :- ଦୁର୍ଘଟଣାରୁ ଅଳ୍ପକେ ବର୍ତି ଯାଇଛି ହୀରାଖଣ୍ଡ ଏକ୍ସପ୍ରେସ୍ । ରେଳ ଧାରଣାରେ ଫାଟ ଜଣାପଡିବା ପରେ ଆଜି ସକାଳ ପ୍ରାୟ ୬ଟା ସମୟରେ ରାୟଗଡ଼ା ଜିଲ୍ଲା ସିଙ୍ଗାପୁର ରୋଡ ଷ୍ଟେସନ ନିକଟରେ ଟ୍ରେନ୍ କୁ ଅଟକା ଯାଇଥିଲା । ପ୍ରଥମେ ସିଗନାଲ୍ ମ୍ୟାନ୍ ଏହା ଦେଖି ଷ୍ଟେସନ ମାଷ୍ଟରଙ୍କୁ ସୂଚନା ଦେଇଥିଲେ । ଏହାପରେ ଷ୍ଟେସନ ମାଷ୍ଟର ଟ୍ରେନ୍ ଟିକୁ ଅଟକାଇବାକୁ ସିଗନାଲ୍ ଦେଇଥିଲେ । ଟ୍ରେନ୍ ଡ୍ରାଇଭର ଏହା ଜାଣିପାରି ତତକ୍ଷଣାତ୍ ଟ୍ରେନ୍ କୁ ଅଟକାଇ ଦେଇଥିଲେ ।
ଫଳରେ ଟ୍ରେନ୍ ଟି ଏକ ବଡ ଧରଣର ଦୁର୍ଘଟଣାରୁ ଅଳ୍ପକେ ବର୍ତି ଯାଇଥିଲା । ଟ୍ରାକ୍ ମରାମତି ପରେ ପ୍ରାୟ ଘଂଟାଏ ବିଳମ୍ବରେ ଟ୍ରେନ୍ ଟି ଜଗଦଳପୁର ଅଭିମୁଖେ ଯାତ୍ରା କରିଥିବା ଜଣାପଡିଛି । ତେବେ ରେଳ ଧାରଣାରେ ଫାଟ କିପରି ସୃଷ୍ଟି ହେଲା ତାହା ଜଣାପଡିନାହିଁ ।
