ଏସୀୟ କ୍ରୀଡ଼ାରେ ଇତିହାସ ରଚିଲେ ଭିନେଶ ,ଭାରତକୁ ଦେଲେ ଦ୍ୱିତୀୟ ସ୍ୱର୍ଣ୍ଣ
ଜାକର୍ତ୍ତା,୨୦ା୮ : ରେସଲର ଭିନେଶ ଫୋଗାଟ ଏସୀୟ କ୍ରୀଡ଼ାରେ ଇତିହାସ ରଚି ୫୦ କିଗ୍ରୀ ଫ୍ରିଷ୍ଟାଇଲ କୁସ୍ତିରେ ସ୍ୱର୍ଣ୍ଣ ପଦକ ଜିତିଛନ୍ତି । ଏହି ଉପଲବ୍ଧି ସହିତ ସେ ପ୍ରଥମ ଭାରତୀୟ ମହିଳା କୁସ୍ତି ଖେଳାଳି ହେବାର ଗୌରବ ଅର୍ଜନ କରିଛନ୍ତି । ସ୍ୱର୍ଣ୍ଣ ପଦକ ପାଇଁ ହୋଇଥିବା ଫାଇନାଲ ମୁକାବିଲାରେ ଭିନେଶ ଜାପାନର ଇତି ୟଜିଙ୍କୁ ୬-୨ରେ ମାତ୍ ଦେଇଛନ୍ତି । ଭିନେଶଙ୍କ ସ୍ୱର୍ଣ୍ଣ ପଦକକୁ ମିଶାଇ ଭାରତ ଏପର୍ଯ୍ୟନ୍ତ ଏସୀୟ କ୍ରୀଡ଼ାରେ ଦୁଇଟି ସ୍ୱର୍ଣ୍ଣ ପଦକ ଜିତିଛି । ଏହି ଦୁଇ ପଦକ କୁସ୍ତିରୁ ହିଁ ଆସିଛି । ଏହାପୂର୍ବରୁ ରବିବାର ବଜରଙ୍ଗ ପୁନିଆ ଏହି ଖେଳରେ ଭାରତକୁ ପ୍ରଥମ ସ୍ୱର୍ଣ୍ଣ ପଦକ ଜିତାଇଥିଲେ ।
ସୋମବାର ଭାରତର ଭିନେଶ ଯେତେବେଳେ ମଇଦାନକୁ ଓହ୍ଲାଇଥିଲେ ସେହି ସମୟରେ ତାଙ୍କ ପାଦରେ ଯନ୍ତ୍ରଣା ହେଉଥିଲା । ଏହାପରେ ମଧ୍ୟ ସେ ନିଜର ସମସ୍ତ ବାଉଟରେ ବିଜୟୀ ହୋଇ ପ୍ରତିପକ୍ଷଙ୍କୁ କୌଣସି ସୁଯୋଗ ଦେଇନଥିଲେ । ଭିନେଶ ପ୍ରତିପକ୍ଷ ଖେଳାଳିଠୁ ୪-୦ରେ ଅଗ୍ରଣୀ ରହିଥିଲେ । ଏହାପରେ ଇତି ଉକି ୨ ଅଙ୍କ ହାସଲ କରିଥିଲେ ମଧ୍ୟ ନିର୍ଦ୍ଧାରିତ ସମୟ ବେଳକୁ ଭିନେଶ ୬-୨ରେ ବିଜୟୀ ହୋଇଥିଲେ ।
