ଡିସେମ୍ବର ୧୫ରୁ ତୋଷାଳୀ କ୍ରାଫ୍ଟସ୍ ମେଳା
ଭୁବନେଶ୍ୱର,୨୦ ନଭେମ୍ବର –ଆସନ୍ତା ଡିସେମ୍ବର ୧୫ ତାରିଖରୁ ଡିସେମ୍ବର ୨୭ ତାରିଖ ପର୍ଯ୍ୟନ୍ତ ସ୍ଥାନୀୟ ଜନତା ମଇଦାନଠାରେ ଚତୁର୍ଦ୍ଦଶ ତୋଷାଳୀ ମେଳା ଅନୁଷ୍ଠିତ ହେବ । ମେଳାରେ ୪୦୦ରୁ ଉଦ୍ଧ୍ୱର୍ ଷ୍ଟଲ୍ ରହିବ । ଏଥିରେ ରାଜ୍ୟ ଓ ରାଜ୍ୟ ବାହାରୁ ୪୦୦ରୁ ଊଦ୍ଧ୍ୱର୍ କାରିଗର ଓ ବୁଣାକାର ଯୋଗଦେବେ । ଭାରତର ବିଭିନ୍ନ ପ୍ରାନ୍ତରୁ ସୁନାମଧନ୍ୟ କାରିଗର ଓ ବୁଣାକାର ସେମାନଙ୍କ ଉତ୍ପାଦକୁ ପ୍ରଦର୍ଶନ କରିବା ସହିତ ବିକ୍ରୟ କରିବେ ।
ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗ ଆନୁକୂଲ୍ୟରେ ବୁଧବାର ଲୋକସେବା ଭବନର ଦ୍ୱିତୀୟ ମହଲା ସମ୍ମିଳନୀ କକ୍ଷରେ ଚତୁର୍ଦ୍ଦଶ ଜାତୀୟ ତୋଷାଳୀ କ୍ରାଫ୍ଟସ୍ ମେଳା ନିମନ୍ତେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ଅଧ୍ୟକ୍ଷତା କରି ବିଭାଗୀୟ ମନ୍ତ୍ରୀ ଶ୍ରୀମତୀ ପଦ୍ମିନୀ ଦିଆନ ଓଡ଼ିଶା ଓ ଭାରତର ଅନ୍ୟ ରାଜ୍ୟଗୁଡ଼ିକର ଜନଜାତିଙ୍କ ଲୋକକଳାକୁ ତୋଷାଳୀ ମେଳାରେ ପ୍ରଦର୍ଶନ କରିବା ନିମନ୍ତେ ପରାମର୍ଶ ଦେଇଥିଲେ । ମେଳାକୁ ନୂତନ ଓ ସ୍ୱତନ୍ତ୍ର ରୂପ ଦେବା ନିମନ୍ତେ ଶ୍ରୀମତୀ ଦିଆନ କହିଥିଲେ । ବିଭାଗୀୟ ସଚିବ ଶ୍ରୀମତୀ ଶୁଭା ଶର୍ମା, ତୋଷାଳୀ ମେଳାର ଆୟୋଜନ ନିମନ୍ତେ ସବିଶେଷ ଆଲୋଚନା କରିଥିଲେ ।
ମେଳା ପରିସରକୁ ସୁଗମ ଓ ପୋଷଣୀୟ କରାଯିବାର ବ୍ୟବସ୍ଥା କରାଯିବ । ମେଳା ପରିସର ପ୍ଲାଷ୍ଟିକ୍ମୁକ୍ତ ହେବ । ତୋଷାଳୀ ମେଳାରେ ସର୍ବସାଧାରଣ ଓଡ଼ିଶାର ଲୋକକଳାକାରଙ୍କ ପ୍ରତିଭା ପଦର୍ଶନ କରିବାର ସୁଯୋଗ ପାଇବେ । ପ୍ରତିବର୍ଷ ପରି ଏ ବର୍ଷ ମେଳାର ବିଷୟବସ୍ତୁ “ହସ୍ତତନ୍ତ’ ଉପରେ ପର୍ଯ୍ୟବସିତ ହେବ । ଓଡ଼ିଶାର ହସ୍ତତନ୍ତର ସ୍ୱତନ୍ତ୍ର କାରିଗରୀ ଓ ଆଜିର ସମୟକୁ ତାଳଦେଇ ହସ୍ତତନ୍ତ ପ୍ରସ୍ତୁତ ଆଧୁନିକ ପରିଧାନ ସହ ମଡେଲମାନଙ୍କୁ ମଂଚରେ ଦେଖିବାକୁ ମିଳିବ ।
