ସିବିଏସଇ ପରୀକ୍ଷା ଫିରେ ବ୍ୟାପକ ବୃଦ୍ଧି ନେଇ ମୁଖ୍ୟମନ୍ତ୍ରୀ ମାନବ ସମ୍ବଳ ବିକାଶ ମନ୍ତ୍ରୀଙ୍କୁ ଲେଖିଲେ ପତ୍ର
ଭୁବନେଶ୍ୱର, ୧୩ ଅଗଷ୍ଟ – ସିବିଏସଇ ଦ୍ୱାରା ଦଶମ ଓ ଦ୍ୱାଦଶ ପରୀକ୍ଷା ଫିରେ ଅହେତୁକ ବୃଦ୍ଧି ନେଇ ଉଦବେଗ ପ୍ରକାଶ କରିବା ସହ କେନ୍ଦ୍ର ମାନବ ସମ୍ବଳ ବିକାଶ ମନ୍ତ୍ରୀ ଡ. ରମେଶ ପୋଖରିୟାଲ ନିଶଙ୍କଙ୍କୁ ପତ୍ର ଲେଖିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗରୀବ ଛାତ୍ର ଛାତ୍ରୀ ମାନଙ୍କୁ ଦୃଷ୍ଟିରେ ରଖି ଏହି ନିଷ୍ପତି ସମ୍ପର୍କରେ ପୁନର୍ବିଚାର କରିବାକୁ ନବୀନ ପଟ୍ଟନାୟକ ଏହି ପତ୍ରରେ ଅନୁରୋଧ କରିଛନ୍ତି ।
ଶ୍ରୀ ପଟ୍ଟନାୟକ ଏହି ପତ୍ରରେ କହିଛନ୍ତି ଯେ ସିବିଏସଇ ଦ୍ୱାରା ଦ୍ୱାରା ଦଶମ ଓ ଦ୍ୱାଦଶ ପରୀକ୍ଷା ଫିରେ ଅହେତୁକ ବୃଦ୍ଧି କରା ଯାଇଛି । ଏସସି, ଏସଟି ଛାତ୍ର – ଛାତ୍ରୀଙ୍କ କ୍ଷେତ୍ରରେ ଏହା ୨୪ ଗୁଣ ହୋଇଥିବାରୁ ଏହା ସ୍ତବ୍ଧକାରୀ ବୋଲି ସେ କହିଛନ୍ତି । ସେ କହିଛନ୍ତି ଯେ ରାଜ୍ୟ ସରକାର ୨ ଶହରୁ ଉର୍ଧ ଇଂରାଜୀ ମିଡିୟମ ସ୍କୁଲ ଗ୍ରାମାଂଚଳରେ ଖୋଲିଛନ୍ତି ଓ ଏଗୁଡିକ ସିବିଏସଇ ଦ୍ୱାରା ଅନୁବନ୍ଧିତ ହୋଇଥିବା କାରଣରୁ ଏହି ଅହେତୁକ ଫିସ ବୃଦ୍ଧି ଗ୍ରାମାଂଚଳର ପିଲା ମାନଙ୍କ ପାଇଁ ଅସୁବିଧା ସୃଷ୍ଟି କରିବ । ତେଣୁ ଏହି ନିଷ୍ପତିକୁ ପୁନର୍ବିଚାର କରିବାକୁ ସେ ଅନୁରୋଧ କରିଛନ୍ତି ।
